José Luís González lærði fyrst hjá föður sínum í fæðingarborg sinni Alcoy, síðan fór hann til framhladsnáms til Valencia og áfram til Madrid. Meðal leiðbeinenda hans á gítarinn voru Regina Sainz de la Maza og Andrés Segovia. Haft er eftir Segovia um José Luís, að fáir ráði yfir betri tækni en hann á gítarinn og að túlkun hans nái ávallt að heilla áheyrendur. José Luís González og Segovia voru til margra ára saman sem leiðbeinendur á námskeiðunum í Santiago de Compostella á Spáni. Þá var José Luís í 7 ár gítarkennari í tónlistarháskólanum í Sydney í Ástralíu, þar sem hann m.a. starfaði með John Williams.

Páll Eyjólfsson varð þeirrar gæfu aðnjótandi að fá leiðsögn José Luís González á árunum 1982 - '84 og aftur 1986.  Þá var José Luís enn við fulla heilsu, hitti nemendur sína dag hvern og hélt tónleika reglulega, fór m.a. í tónleikaferðir til Japan a.m.k. einu sinni á ári.  Hann var einstaklega natinn kennari og óspar á þekkingu sína.  Ef hann fór í sumarfrí með fjölskyldunni, mættu áhugasamir nemendur í tíma til hans í sumarbústaðinn.  Hann kenndi í einkatímum heima hjá sér, í örlitlu herbergi, þar sem ekki var bannað að reykja og oft boðið uppá rauðvínsglas. Þar var aldrei lokað vegna jólafrís, páska- eða sumarfrís.  José Luís lét þess oft getið við nemendur sína að hann hafi verið að ræða í símann við Segovía um hvernig best væri að ná fram hinum eina sanna tón, í viðfangsefnum dagsins. José Luís fékk aðkenningu af hjartaslagi um 1987 og lést í mars 1998, ekki orðinn sjötugur.  Við hefðum viljað eiga samtöl við hann í a.m.k. 20 ár enn.

 

 

Back